ជាធម្មតារថយន្តត្រូវបានវិស្វករផលិតរថយន្ត
បង្កើតលក្ខណៈពិសេសៗដើម្បីជួយការពារនិងផ្តល់សុវត្តិភាពដល់អ្នកបើកបរនិងអ្នករួមដំណើរជាមួយ។
ក្នុងក្របខណ្ឌនេះ គ្រោះថ្នាក់ចរាចរណ៌ ភាគច្រើនគឺបណ្តាលមកពីកត្តាមនុស្ស។ ដូចនេះ
យើងខ្ញុំសូមលើកយកការប្រុងប្រយ័ត្នក្នុងការបើកបរដែលពាក់ព័ន្ធនឹងកត្តាមនុស្សដូចខាងក្រោម៖
១. សូមកុំលេបថ្នាំ ហើយបើកបរ
ការលេបថ្នាំ ដើម្បីបំបាត់គ្រុនក្តៅ ផ្តាសាយ ឫ ការលេបថ្នាំច្រើនជ្រុល
អាចប៉ះពាល់ដល់អារម្មណ៌របស់អ្នកនៅពេលបើកបរ។ ប្រសិនបើអ្នកមានអារម្មណ៌មិនល្អ
ឫមិនទុកចិត្តខ្លួនឯងក្នុងការបើកបរ សូមកុំបើកបរអោយសោះ ហើយអោយគេបើកជំនួសវិញ។
២. សូមកុំអោយមានការរំខាននៅពេលបើកបរ
ការនិយាយទូរស័ព្ទនៅពេលបើកបរលឿន ការសរសេរសារ
ឫការឆែកហ្វេសប៊ុកកំពុងបើកបរ ធ្វើអោយអ្នកបើកបរមិនសូវផ្តោតអារម្មណ៌លើការបើកបរ និងអាចបង្កអោយមានគ្រោះថ្នាក់ដល់ខ្លួនឯង
និងអ្នកដ៏ទៃ។
យើងឃើញថា អ្នកបើកបរជាច្រើនបានដាក់កូនអង្គុយនៅក្បែរកន្លែងអ្នកបើកបរ។
នេះក៏ជាកត្តាដែលធ្វើអោយអ្នកបើកបរមិនសូវមានអារម្មណ៌មូលក្នុងការបើកបរដែរ។ ករណីជាក់ស្តែងមួយ
គឺ Admin
បានជិះរថយន្តតាមបណ្តោយផ្លូវលេខ៥៩៨
ចេញពីរង្វង់មូលកាំកូ ក៏វាក់នឹងរថយន្តមួយ ដែលហាក់ដូចជាមិនបានមើលឆ្វេងស្តាំចេញស្ទុយពីផ្លូវក្នុងកាត់ទទឹងផ្លូវធំដែលAdmin
កំពុងជិះ
ធ្វើអោយAdmin
គេចស្ទើរគ្រេចចង្កេះ។
Admin សម្លឹងមើលក្នុងឡានឃើញមានកូនក្មេងនៅខាងមុខ។
តែក៏អាចថាបានដែរថា គាត់បើកមិនខ្វល់ពីអ្នកណាទាំងអស់ពីព្រោះ
នៅភ្នំពេញនាថ្ងៃទី២បុណ្យចូលឆ្នាំខ្មែរមិនសូវមានឡានបើកបរច្រើនទេ។
ទោះជាយ៉ាងណាសូមកុំដាក់កូនអង្គុយនៅខាងមុខ
ជាពិសេសនៅពេលបើកបរផ្លូវឆ្ងាយ។
៣. សូមកុំបើកបរនៅពេលងងុយគេង
អ្នកត្រូវគេងអោយបានគ្រប់គ្រាន់នៅពេលយប់
ប្រសិនបើអ្នកត្រូវបើកឡាននៅពេលព្រឹក។ ប្រសិនបើអ្នកងងុយគេងខ្លាំងនៅពេលបើកបរ
អ្នកអាចឈប់សំរាក់១៥នាទីយ៉ាងតិច ទើបបន្តដំណើរទៅមុខទៀត។ ម្យ៉ាងទៀត
អ្នកអាចញុំរបស់អ្វីដែលជូរៗ ដើម្បីជួយកាត់បន្ថយការងងុយគេងរបស់អ្នក
ប្រសិនបើអ្នកចាំបាច់ត្រូវតែបើកបរ ប៉ុន្តែដើម្បីសុវត្ថិភាពអ្នក
និងក្រុមគ្រួសាររួមទាំងអ្នកដទៃ សូមអ្នកកុំបើកបរអី។
៤. សូមគ្រប់គ្រងល្បឿនរបស់អ្នក
សូមអ្នកកុំបើកបរលឿនពេកនៅពេលជិះផ្លូវឆ្ងាយ
ពីព្រោះអ្នកអាចនឹងវាក់នឹងសត្វដែលរត់ចេញពីព្រៃ ឫអ្នកថ្មើរជើង ឫអ្នកភូមិដែលរត់កាត់ថ្នល់ភ្លាមៗ។
នៅពេលអ្នកមានអារម្មណ៌ថា
អ្នកមិនអាចគ្រប់គ្រងរថយន្តបានក្នុងល្បឿនដែលអ្នកកំពុងបើកបរ
សូមប្រញាប់បន្ថយល្បឿនភ្លាម។
ជាធម្មតាហើយថា អ្នកខ្លាចខាតពេលទើបបើកបរអោយលឿនដើម្បីអោយឆាប់ដល់
ក៏ប៉ុន្តែអ្នកអាចខាតពេលជាងនេះទៀត ប្រសិនបើជួបគ្រោះថ្នាក់ចរាចរណ៌។
៥. សូមកុំពិសារគ្រឿងស្រវឹងបើអ្នកត្រូវបើកបរ
ជាធម្មតា យើងច្រើននិយាយថា ដាក់ប៉ុណ្ណឹងមិនអីទេ! តែអ្នកត្រូវដឹងថាដាក់ប៉ុណ្ណឹងមិនស្រវឹងក៏ដោយ
ក៏អាចអោយអ្នកមានអារម្មណ៌ងងុយគេង ឫអារម្មណ៌ធីងធោងខ្លះដែរ
និយាយរួមអ្នកមានអារម្មណ៌មិនមូលក្នុងការបើកបរ។
សូមកុំពិសារគ្រឿងស្រវឹង សូម្បីតែបន្តិចក៏ដោយ បើអ្នកពិតជាខ្វាយខ្វល់
និងស្រលាញ់ខ្លួនអ្នក ក្រុមគ្រួសារ និងជីវិតអ្នកដ៏ទៃ។
សូមអរគុណ!
VattanacPheap
